Kişilərə qarşı şiddətə son

Deyirəm, camaat şir-pələng saxlayır, kosmosda "jizni" qurur, bizdə hələ də "kişi şortik geyinə bilər ya bilməz" kimi qlobal problemlərə çözüm axtarılır.

Deməli, ötən gün bir status oxudum ki, kişi cinsinin nümayəndəsi olan cavan bir vətəndaş gedib "prava" imtahanına. Ödənişləri filan edib amma onu imtahan zalına buraxmayıblar.

- Niyə?

- Ona görə ki, qardaş şortiklə gedibmiş. Nə illah edib izah etsin ki, burda qeyri-adi heç nə yoxdur, alınmayıb. "Yox ki, yox" - deyib geri qaytarıblar.

- Pulunu geri qaytarıblar bəs?

- Yuxulusuz, qaliba...

Nəysə... Bu gün məsələyə DYP rəsmisi Kamran Əliyev belə izah verib. Diqqətlə oxuyun:

"Milli mentalitetimizdə də dövlət orqanlarına çəkələklə, şortiklə getmək etik cəhətdən qəbul olunmazdır. Bununla bağlı orada olan qadınlar da şikayət edib narazılıq bildirirdilər ki, şortikli kişilərin gəlib burada oturması etik deyil. Qadın gödək paltar da geyinə bilər, şortik də. Ona heç kim heç nə deyə bilməz, bu onun haqqıdır, onun öz hüququdur. Amma kişilərin bizim cəmiyyətdə qəbul olunmaz formada geyinib gəlməsi uyğun deyil. Bəlkə də hələ o zaman gəlib çatmayıb, bizdə kişilərin belə geyinməsi ictimaiyyət arasında qəbul olunmur. Bu səbəblə kişilərə tövsiyə olunur ki, dövlət qurumlarına uyğun geyimdə gəlsinlər. Bu, bizim istəyimiz yox, bura gələn digər şəxslərin tələbi, müraciəti ilə."

Əslində, nə demək istədiyi başa düşüləndi e, hər yerin qəbul olunan bir geyim tərzi var. Məsələn, kimsə toya şapşupla, çəkələklə getməz. Gedən olsa, dünya dağılmaz, kimsənin də vecinə olmaz, amma qəbul olunan bir qayda, yeni dildə dress kod var da. Heç yerdə yazılmayıb ki, toya belə, yasa belə, meşəyə-dağa belə, diskotekaya ancaq belə geyinmək lazımdır. Bu, ümumi formalaşan bir qaydadır, cəmiyyət olaraq qəbullanmışıq.

Başa düşülməyən şey, bu açıqlamanın bu qədər bəsit, qeyri-ciddi və qıcıq yaradacaq şəkildə olmasıdır. Belə baxsaq, bir kişinin şortiklə imtahana gəlməsini milli mentalitetə bağlayan, qeyri-etik hesab edən bir qurum nümayəndəsinin məsələyə belə açıqlama gətirməsi də ümumi formalaşan qaydalara ziddir və cəmiyyətdə qəbul olunmur.

Milli mentalitet ee. Hüquq, qanun yox haa, milli mentalitet...

Necə yəni, "Qadın gödək paltar da geyinə bilər, şortik də. Ona heç kim heç nə deyə bilməz, bu, onun haqqıdır, onun öz hüququdur. Amma kişilərin bizim cəmiyyətdə qəbul olunmaz formada geyinib gəlməsi uyğun deyil"? Harda yazılıb qadının haqqı hüququdur, kişinin haqqı hüququ olmadığı? Rəsmi açıqlamada bu fikir hansı qanuna uyğun formalaşıb?

Bu çözülməz problemi həll etmək üçün təklif edirəm ki, sürücülük imtahanı verməyə kişilər ağ köynək, qara (və ya tünd göy) şalvar geyinib nazik qalstuk vursun, qadınlar da gödək yubka və ya şortik, ağ köynək, başlarında da qoşa ağ bantik.

Pulsuz "prava" almağın bir özəlliyi olmalıdı ya yox?

Gör ora gedib, "kişilər şortiklə gəlməsin evdə anamız-bajımız var" - deyən bircə nəfər şəxs çıxıb tələb edərmi ki, imtahan prosesini ləğv edin "prava"nı elə pulla alaq, bura gəlib vaxt itirməyə nə lüzum var axı? Eləməzlər. Eləsələr də kimdi eşidən? Pulla "Prava" olar, sən allah? Olmaz! Çünki bu, bütün mental, insani və hüquqi dəyərlərə hayqırıdır, qanunları heçə saymaqdır. Buna getmək olmaz. Bu işdə yeganə problem, kişilərin şortiklə imtahana getməsidir, onun da çıxış yolunu yazdım - rəsmi dress kod.

Günümüzə, dərdimizə bax da...