"Təhsilə cəmiyyətin ehtiyacını, təhsilin və təhsilli insanların nüfuzunu dəqiq əks etdirən göstəricilərdən biri də təhsil səviyyəsinin əmək haqlarının məbləğində yaratdığı fərqlərdir".
Dominant.az xəbər verir ki, bunu iqtisadçı-ekspert Rövşən Ağayev deyib.
R.Ağayev təəssüflə qeyd edib ki, Azərbaycan rəsmi statistikası belə statistik məlumatlar hazırlamır: "Yalnız ev təsərrüfatlarının büdcə müayinəsində ailə başçısının təhsil səviyyəsinə görə ailələrin adambaşına gəlirləri arasında fərqə dair məlumat təqdim olunur. Bu statistikaya görə, 2019-cu ildə ailə başçısı ibtidai təhsilli ailələrdə adambaşına gəlir tam orta (11 illik) təhsillilərdən cəmi 1,5% azdır. Ali təhsillilərdə isə tam orta təhsillilərdən 15% çoxdur".
İqtisadçının sözlərinə görə, OECD bizim Statistika Komitəsindən fərqli olaraq hər il üzv ölkələrin hər biri üzrə təhsil səviyyəsinə görə əmək haqqı səviyyəsindəki fərqlərə dair statistika dərc edir: "2018-ci ilin nəticələrinə görə, Estoniyada natamam orta təhsillilərin maaşı tam orta təhsillilərdən 11% az, ail təhsillilərin maaşı tam orta təhsil alanlardan 36% çox olub. Ali təhsillilərin əmək haqqı səviyyəsi tam orta təhsil alanlara nisbətən ABŞ-da 76%, Türkiyədə 66%, Çexiyada 58%, OECD üzrə isə orta hesabla 51% yüksəkdir".
"Əgər bizim statistikamızın az-çox gerçək olduğunu qəbul etsək, ibtidai və ali təhsilli əmək qabiliyyətli şəxsin aylıq qazancı arasında fərq 16-17%-i ötmür. İnkişaf etmiş ölkələrdə isə 2 dəfəyə yaxındır", - R.Ağayev vuğulayıb.