Yoxuş aşağı itələnmiş medianı necə xilas etmək olar?

15 Sentyabr 2020 14:30    355 Baxış   
Yoxuş aşağı itələnmiş medianı necə xilas etmək olar?
Azərbaycan illər öncə Qafqazın ən güclü media quruluşu olan ölkəsi sayılırdı. Ancaq doxsanıncı ildən başlayaraq bu prosesdə ciddi problemlər yaşandı.

İndi "müstəqil medianın daha güclü olması üçün mübarizə aparılmayıb" fikrini eşitmək, o qədər də xoş olmur. O mübarizə aparılıb. İndi sizə qısaca o xronologiyanı təqdim edirəm.

Ölkə mediasını indiki vəziyyətdən, dalana dirənmiş durumdan, ancaq o problemlərin geriyə çevirməklə, xilas edə bilərik.

Bu işdə, dövlətimizin ədalətli qərar verəcəyinə əminəm. İnanıram ki, qısa zaman kəsiyində medianın vəziyyətindən dolayı qərarlar sürətlə veriləcək. Bu prosesin tənzimlənməsi üçün, ikinci dönəm müstəqillik illərinin qısa tarixinə ciddi bilmək və ya prosesi bilənlərlə mütləq ciddi danışıqlara başlamaqda fayda var.

Böyük bir sektoru çökdürmək üçün

- Çap mediasına kağız qıtlığı yaradıldı.

- Alternativ media quruluşları, "Kaspi", "Palitra", "Azadinform" yaradıldı ki, yazarlar işsiz qalmasın, yəni kütləvi narazılıqlar yaranmasın. Xatırladıram, "Azadlıq" qəzetinin doxsanlardakı böyük bir heyəti, məhz "Kaspi"də çalışdı ehtiyaclar üzündən.

- İqtisadi sanksiyalar tətbiq olundu, verigilər artırıldı. Hesabların dondurulması problemi belə yaşandı.

- Senzura tətbiqinə start verildi.

- Reklam bazarı bağlandı.

- KİV haqqında qanunvericilik bazası zəiflədildi. Jurnalistlərin və KİV-lərin bir çox hüquqları məhdudlaşdırıldı.

- Xarici qrantlar kəsildi. Yerli media və QHT sektoru üçün Milli QHT Şurası quruldu.

QEYD: Məqsəd o idi ki, yerli QHT və medianın maliyyəsini verməyə paralel, həm də dövlət ona nəzarət edə bilsin. Əslində, böyük bir maliyyə üzərində, ciddi inhisar yarandı. Deyilə bilər ki, axı xarici qrantlar da böyük təhlükə idi. Bəli, təhlükə idi. Amma maliyə mənbələri bəlli idi və dövlətin əlində prosesə də, maliyyə sərfiyyatına da ciddi nəzarət imkanları mövcud idi. Odur ki, bu məhdudlaşmanı təsadüf hesab etmək olmaz. Çünki həmin xarici qrantlar indi Avropa və Qərbdəki anti-Azərbaycan mövqeli, azərbaycanlı mühacirlərdən ibarət KIV-lər və söyüş müxalifətinə yönəldilib.

...Qayıdaq medianın yoxuş aşağı itələnməsi prosesinə...

- Jurnalistlərə qarşı kütləvi təzyiqlər başlandı. Fiziki zorakılıq, cinayət işləri, həbslər, xarici xüsusi xidmət orqanları ilə əməkdaşlıq kimi ittihamlar səsləndi. Bu, milli medianı ictimai nüfuzdan salmağa yönəlik plan idi.

- Yaranan durumla bağlı KİV-lər etiraz aksiyasına başladı.

- Rus və ingilis dilli media, demək olar, tamamilə sıradan çıxarıldı.

- Bu prosesin lap əvvəlində Mətbuat və İnformasiya Nazirliyi ləğv edildi.

Qeyd: Nazir Sirus Təbrizlinin yaşadığı və üzləşdiyi presinqlərə ürəyi tab gətirmədi. İndi o həyatda olmasa da, ailəsi Sirus bəyə edilənləri yəqin ki, unutmaz.

***
Bir dönəm dövlətlə KİV-in danışıqları başlandı. Bu danışıqlar Azərbaycanda həm də məmur mediasının bünövrəsini qoydu.

Nəticə o oldu ki, ölkədə fəaliyyət göstərən xarici KİV-lərin rəsmi fəaliyyətinə xitam verildi. Bunun nəticəsində indi Azərbaycanda xarici KİV-lərə çalışan küçə reportyorları fəaliyyətə başladı. İndi dövlət onların nə peşəkar fəliyyətinə, nə də maliyyə qaynaqlarına nəzarət edə bilir.

Azərbaycan milli mediasının "vurulması" həm də xidmət etdi ki, Azərbaycan regional və beynəlxalq informasiya savaşında ləngidi. İçində olduğu prosesdə öz maraqlarını yetərincə təmsil edə və öz strategiyasını səmərəli qura bilmədi. İndi biz bu işdə qardaş Türkiyədən dəstək almağa məcburuq. Öz mediamızı isə bu savaşın təşkilatçıları "satqın, şərəfsiz, ləyaqətsiz, rüşvətxor" adlandırdı.

İndi məqam odur ki, bu sadalananlardan ölkənin media sektorunu kurasiya edənlər ciddi nəticələr çıxarsın. Qanunvericilikdə dəyişiklik olmazsa, iqtisadi presinq aradan qaldırılmazsa, reklam bazarı açılmazsa, heç nə dəyişməyəcək. Çıxış yolu çoxlu sayda yeni KİV-lər yaratmaqda deyil. İdeoloji xətti müəyyən etməkdə və sadalanan üç element nəzərə alınmaqdadır.

Buna paralel, müstəqil və tənqidi mediaya meydan verilməlidir. Rusdilli və ingilisdilli medianın inkişafı üçün layihə hazırlanmalıdır. Milli media simaları, hətta media quruluş rəhbərlərini belə, ciddi şəkildə "ələməlidir".

Jalə Mütəllimova



Bölməyə aid digər xəbərlər
Xəbərlər
Bütün xəbərlər
Ən çox oxunanlar