Polis şöbəsində müəllimin döyülməsi iddiasına - DİN-dən reaksiya - Video

Ağsu rayonunda YAP üzvü olan müəllimə qarşı polis zorakılığı baş verib.

Bu barədə Respekt.az-a zorakılığa məruz qalan Mikayıl Zeynalovun dayısı oğlu Müğbil Qəmbərov bildirib.

Onun sözlərinə görə, o, və bibisi oğlu Mikayıl Zeynalov Ağsu rayon polis rəisinin vəzifə səlahiyyətlərini aşmasına irad bildirən müsahibə veriblər. Hər şey də bundan sonra başlayıb.

M.Qəmbərov bildirir ki, sentyabrın 7-də atası Malik Qəmbərov və bibisi oğlu Mikayıl Zeynalov rayon təhsil şöbəsinə dəvət edilmək adı ilə evdən çağırılıb və Ağsu rayon Polis Şöbəsinə aparılıblar. Atası bir neçə saat sonra azad edilsə də, bibisi oğlu M.Zeynalov işgəncəyə məruz qalıb.

M.Qəmbərov iddia edir ki, M.Zeynalovun qabırğası sındırılıb və başı yarılıb: "Hətta təcili tibbi yardım çağırılsa da, onun yaralıya yardım etməsinə icazə verilməyib".

Məsələ ilə bağlı Daxili İşlər Nazirliyindən Respekt.az-a verilən məlumatda isə bildirilir ki, sosial şəbəkələrdəki bəzi səhifələrdə paylaşılmış videogörüntülərdə Ağsu rayonunun Cəlayır kənd sakini Muğbil Qənbərovun Rayon Polis Şöbəsinin əməkdaşları haqqında iddiaları uydurmadır və qərəzdən irəli gəlir:

"Belə ki, onun atası Malik Qənbərov DİN-in “102” xidməti-zəng mərkəzinə və Ağsu RPŞ-yə ərizə ilə müraciət edərək həmkəndlisi Saləməddin Əhmədov tərəfindən döyülməsini bildirmişdir.

Araşdırma zamanı hadisənin şahidləri izahat verərək Malik Qənbərovun Saləməddin Əhmədovla mübahisə etdiyini, lakin sonuncunun M.Qənbərova hər hansı xəsarət yetirmədiyini bildiriblər. Toplanmış material üzrə cinayət tərkibi olmadığından cinayət işi başlanmasının rədd edilməsi barədə Ağsu RPŞ-nin baş təhqiqatçısı Vüsal Hüseynov tərəfindən qərar qəbul edilib.

Daha sonra avqustun 6-da Muğbil Qənbərov qisas almaq üçün özünün yük avtomobili ilə Saləməddin Əhmədovun evinin darvazasına vurmuşdur. Bu iki şəxs arasında mübahisə olduğundan və həmin mübahisə davam etdiyindən onlar münaqişəli qonşular kimi profilaktiki qeydiyyata alınmışlar.

Muğbil Qənbərov öz çıxışında Cəlayır kənd sakini Gözəl Əhmədovanın sahəsinin zəbt edilməsi və ona təzyiqlərin olmasını da bildirmişdir.

Müəyyən edilmişdir ki, may ayında G.Əhmədova yaşadığı evin həyətindəki hasarı sökərək həyətyanı sahəsini qanunsuz olaraq genişləndirmiş və bələdiyyənin nəzarətində olan torpağı zəbt etmişdir. Avqust ayında həmin ərazinin bələdiyyəyə məxsus olması və onun bu torpağı zəbt etməsi barədə G.Əhmədovaya rəsmi bildiriş göndərilərək zəbt etdiyi torpaq sahəsini boşaltmayacağı təqdirdə barəsində qanunamüvafiq tədbir görüləcəyi bildirilib. Bundan sonra G.Əhmədova Daxili İşlər Nazirliyinə müraciət edərək kəndin Bələdiyyə sədri Ülvi Əhmədov barəsində şikayət və tələbinin olmadığını bildirmişdir.

Muğbil Qənbərovun çıxışında Ağsu RPŞ-in İstintaq Qrupunun müstəntiqi polis baş leytenantı Rəhim Əhmədovun Səbuhi Nəsirovu döyərək xəsarət yetirdiyi barədə dedikləri də qərəzdən irəli gəlir.

Belə ki, Səbuhi Nəsirov avqustun 9-da Ağsu rayon Polis Şöbəsinə dəvət olunmuş, lakin heç bir əsaslı səbəb olmadan ifadə verməkdən imtina etməklə, özünü pis hiss etdiyini deyərək RPŞ-nin ərazisini tərk etmişdir. S.Nəsirov barəsində məcburi gətirilmə qərarı qəbul olunmuş və icrası Ağsu RPŞ-nin İTB-yə həvalə olunmuşdur.

Bundan başqa, həmin görüntülərdə adları çəkilən kənd sakinləri Mikayıl Zeynalov və Əjdər Abbasov xırda xuliqanlıq hərkətlətinə yol verdikləri üçün İnzibati Xətalar Məcəlləsinin 510-cu maddəsi ilə 50 manat məbləğində cərimə olunmuşlar. Onlara qarşı hər hansı qanunsuz hərəkətlərə yol verilməmişdir".