Dominant.az Mahir Mehdinin yeni şeirini təqdim edir:
... Açılıb taybatay,
göründü hərf - hərf,
dibdəki anlamı
üzü bu adın.
Özümü soyunub
sonuncu dəbdə,
ölçümü eninə
uzun yaşadım.
Qaçıb, heçdə çıxdım
birinci yerə,
oldum hər tərəfdən
sıranın ilki.
Atəşə tutuldu
şeir postları,
verdim misra - misra
çoxqatlı itki.
Dəyişib sözbəsöz
mənim olanlar
girdi ayrı notda
saysız yozuma.
İxtisar eləyib
son bölümünü,
mahnı bəstələdim
alın yazıma.
Rəqəmsiz - fılansız
düşdüm tarixə,
yazıldı gəlişim
min addan qabaq.
Hər şeyi ölçürsən
İsa yaşıyla,
biz ki, doğulmuşuq
miladdan qabaq...