"Mənim Şəhidim, mənim Döyüşçüm Mata qədər də olmadı?!"

"Avroviziya - 2021" mahnı müsabiqəsində Azərbaycanı təmsil edən Samirə Əfəndi "Mata Hari" mahnısını ifa etdi. Təqdim olunan bəstənin müəllifləri niderlandlı Amy van der Vel, Coş Earl və Lyuk van Birsdir. "Mata Hari" adlı mahnı birinci dünya müharibəsində casus kimi günahlandırılan niderlandlı erotik rəqqasə Mata Harinin həyatından bəhs edir. Bu, o Mata Haridir ki, birinci dünya müharibəsi illərində Almaniyanın xeyrinə casusluq edib. Erotik rəqslərin əvəzolunmaz ifaçısı və kurtizan qadın olan Marqareta Gertruda Zelle alman kəşfiyyatına xidmət edib. 41 yaşlı Mata Harini fransız kəşfiyyatı edam edib. Sual olunur: hansısa bir Matanın Azərbaycanla, Azərbaycan mədəniyyəti ilə nə əlaqəsi? Yaxud da onun casusluq və Azərbaycan əxlaqına sığmayan davranışlarının bizim ölkə üçün nə faydası olub ki, haqqında yazılan mahnı azərbaycanlı ifaçının təqdimatında beynəlxalq arenaya çıxarılıb? Kimsə irad tuta bilər ki, Avropa yarışması olduğu üçün Avropa standartlarına uymaq, Avropa qəlibinə sığmaq lazımdı. Etiraz etmirəm, olsun. Amma mahnı təqdimatını elə seçmək lazımdı ki, həm Avropa satandartlarına cavab versin, həm də Azərbaycanla bağlı olsun. Məsələn, 2016-cı ildə ukraynalı müğənni Camala "1944" adlı mahnısı ilə müsabiqənin qalibi oldu. Mahnı 1944-cü ildə Krım tatarlarının Mərkəzi Asiyaya deportasiyası zamanı müğənninin nənəsinin itirdiyi qızı haqqında idi, üstəlik mahnının sözlərini də Camalanın özü yazmışdı. Avropa qəlibində olan siyasi məzmunlu mahnını tatar musiqiçisi bəstələmişdi.