UFC Bakı gecəsində 4 azərbaycanlı döyüşçü mübarizə aparacaq

Dünyanın ən nüfuzlu qarışıq döyüş növləri təşkilatı olan UFC-nin ölkəmizdə keçiriləcək növbəti turnirində azərbaycanlı idmançılar Rafael Fiziyev, Nazim Sadıqov, Tahir Abdullayev və Fərman Həsənov oktaqona çıxacaqlar.

Turnir gənc və perspektivli döyüşçülər üçün də əlamətdar olacaq. Belə ki, Tahir Abdullayev və Fərman Həsənov UFC-də ilk döyüşlərinə çıxaraq təşkilatda rəsmi debüt edəcəklər. Hər iki idmançı üçün bu qarşılaşmalar karyeralarında yeni mərhələnin başlanğıcı hesab olunur.

Gecənin əsas döyüşündə isə Azərbaycanın tanınmış UFC təmsilçisi Rafael Fiziyev meksikalı Manuel Torres ilə qarşılaşacaq. Döyüş gecəsinin ən maraqlı və prinsipial görüşlərindən biri hesab edilən bu qarşılaşma azarkeşlər tərəfindən böyük maraqla gözlənilir.

Kartda Azərbaycan təmsilçiləri ilə yanaşı, Türkiyənin tanınmış döyüşçülərindən olan Abdurahman Yahyayev də çıxış edəcək. Onun iştirakı qardaş ölkədən olan MMA həvəskarlarının da diqqətini Bakıya yönəldib.

Qeyd edək ki, bu, UFC-nin Bakıda təşkil etdiyi ikinci turnirdir. Dünyanın müxtəlif ölkələrindən döyüşçülərin iştirak edəcəyi tədbirin minlərlə azarkeşi bir araya gətirməsi gözlənilir. UFC Bakı gecəsi həm Azərbaycan idmanının beynəlxalq arenadakı tanıtımı, həm də ölkəmizdə döyüş idman növlərinə marağın daha da artması baxımından mühüm əhəmiyyət daşıyır.